Tratto dall’opera cabarettistica "Sket...ciù!"
 di Anna Mauro

POSTEREZIONI
(tempo di elezioni)

Personaggi
Due donne oppure un uomo e una donna

Fermata dell’autobus

E quant’av’aspittari na cristiana…Autri chi mienzi pubblici…chisti su cessa pubblici! Oh! ‘Nta chiddu chi passò antura u’n ci trasieva mancu ‘na vugghia. A st’autobussu c’avissiru a dari fuocu. Abbasta c’un fannu circolari i machini…ma no i machini ri tutti…i machini ri puviriedda, ri chiddi chi nn’annu una sula…Viri si u sinnacu si pigghia i cessa pubblici, viri si u guviernu si pigghia i cessa pubblici. Ma poi ju picchì m’addannu? Ju machina mancu nn’aju. Ju caminu a piruna, cu nummaru rui. Perciò menz’ura sutta u suli a firmata… Menz’ura!
Chisti né chi su mienzi pubbrici, chisti su cessa pubblici.
Ccà è! Vuotu, u sapja.
Ma bella, a verità!

(Buio. Finge di essere sull’autobus)

Quantu m’assiettu…Signora, mi pozzu assittari i lato a lei?
Ahi! Chi peri vunci chi aju! Stanca sugnu!
‘Nta sta città, accamuora, n’è chi travagghianu l’autisti!
Travagghianu l’attacchini.
Taliassi chi munnizza ri carta chi c’è.
Poi ricinu r’un ghittari a carta menz’a strata…
L’erezioni finieru…mancu u tiempu ri finiri e stannu attaccannu all’autri.
Signò! Ma ri runni cazzu i pigghianu tutti sti picciuli?
U sapj, signora? Assira mi vitti u telegiornali. E arristavu alluccuta.
Vitti ‘na torta…U sapj zocch’era?
L’Italia! Ju m’arricurdava un stivale ri quannu iera a scuola, ora addivintò una torta.
Signò! Fuoru accussì bravi chi s’a spartieru.
C’azziccaru a furchietta. Vieru! U rissi a presentatrice. Ma bella, a verità!…a furchietta (ride)
A furchietta! C’è i muoriri…Azziccanu a furchietta. A mienza a mienza, mancu a fallu apposta.
Appiru a sbagliari ri corchi muddica…un burdiellu ficiru!
Signò, a picca s’affirravanu.
…”Ci su mbruogghi…Ci su i schedi ‘nta munnizza…” Ma bella, a verità.
Secunnu mia su tutt’appattatti. S’appattanu prima.
I nuautri si nni stannu futtiennu.
Poi fannu finta i sciarriarisi…Persone civili…
Fussiru comu ricinu iddi i cuosi, ‘ncà và, s’avissiru a sciarriari com’i cani, s’avissiru a pigghiari a muzzicuna, no c’arriestanu accussì: sani sani
Signò! Ma secunnu lei, piccù avissimu a votari?
A nà banna ci su tutti l’accutturati, i prufissuruna.
U’n semu nuautri!
Nuautri semu cchiù gniuranti ra calia.
Mancu si nni cuocinu c’u bicarbonato pì farinn’accutturari, ci ponnu arriniesciri..
All’autra banna ci su i riccuna…i patruna…
U’n semu nuautri! I cani nni muzzicanu picchì semu i cchiù spardati.
Giustu giustu cu ju a pierdiri l’autra vutazza? U prisirienti!
Avissi livatu l’ICI e a munnizza.
Ri l’ICI mi nni futtu picchì casa i proprietà unn’aju! Ma bellu avissi statu chi u prisirienti mi vinieva a livari a munnizza finu a casa.
A verità e chi “Cu acchiana acchiana e ri nuautri si nni futti!”
Ma poi qual’è a destra e a sinistra, lei mu sapj a diri?
U’n l’è pututu capiri mai.
A mia mi parinu tutti manciatari e basta.
Può iessiri chi chisti appizzati ‘nte strati a manu ritta sunnu a destra e chiddi chi su appizzati a manu manca su i sinistra?
Ma poi chi su lari, signò…
Ma cu schifia ci fa sti fotografie…
Lari, ma lari!
Taliassi a chistu, signora. Avj l’uocchi i purpu. Chiddu pari chi fussi u prisirienti ra repubblica cu ddi microfoni dda ravanzi. Ma cu u canusci? Ma cu l’ha bistu mai? Lei u canusci?
E chista chi dici…si sì fimmina vota pì mia, si sì masculu vota pì mia. E si fussi un frocio? Votaci puru.
Signò, taliassi a chiddu…avanti…avanti…u taliassi buonu. U truccaru. Avj a matita nivura ‘ntall’uocchi. Ci pari chi è na velina...
Ma viri chi su fradici chisti….la Sicilia nel mio cuore…la Sicilia nella mia mente….la Sicilia nella mia min…chi stava riciennu!
E taliassi stu linzuolu ccà supra ch’è granni! Chi ci scrissi? A sostegno dei più deboli. Ma prima ri sostenere all’autri picchì u’n si fa sostieniri ddi masciddi e ddu varvaruottu carutu chi avj?
E ch’è luocco st’autru! Aiutatemi a difendervi. E n’avissimu a fari difienniri ri unu chi vuoli aiutu? Fussimu vieru cunzumati.
(legge) Un’opportunità da non perdere. E chi è, u superenalotto?
E st’autru…un politico che lavora. Picchì l’autri giustamente cugghiunìanu.
Mah! Ma ppì cu s’av’a vutari? Chi sugnu confusa! Chi c’è scritto ccà? UDC con Casini. U capivu! Unione dei casini. E siccome ju sugnu ‘nte casini, m’agghiunciu cu iddi. Arrivavu, signò. Buona giornata! Permesso! Permesso!